Job 21

UJobe Uyaphendula

1UJobe wasephendula wathi:

2“Lalelani kuhle amazwi ami; lokhu kungenza liwuthobe umoya wami.

3Ake lingibekezelele nxa ngisakhuluma, ngithi nxa sengikhulumile liklolode.

4“Ukusola kwami kuqonde umuntu yini? Ngingayekelelani ukucunuka pho?

5Ngikhangelani, lizamangala; vulani imilomo yenu ngezandla.

6Nxa ngikhumbula ngalokhu ngitshaywa luvalo; ngizwa umzimba wami uqhuqha.

7Kungani ababi bephila impilo ende, baluphale nje amandla abo esanda?

8Babona abantwababo bezinza behlala kakuhle, inzalo yabo layo beyikhangele.

9Imizi yabo ihlezi kayilakwesaba; induku kaNkulunkulu kayikho phezu kwabo.

10Izinkunzi zabo zikhuthele ziyazala; amankomokazi abo azala kuhle kawaphunzi.

11Abantwababo bayazihambela nje besamhlambi; izingane zabo ziyazigidela zichelesile.

12Bayahlabela betshaya izigubhu lamachacho; bayazithokozisa ngomsindo wemiqangala.

13Yonke iminyaka yabo ngeyokuphumelela baze bayongena egodini belokuthula.

14Kodwa bathi kuNkulunkulu, ‘Tshiyana lathi! Kasifisi ukuzazi izindlela zakho.

15Ungubani yena uSomandla ofuna ukuthi simkhonze na? Sizazuzani nxa sikhuleka kuye na?’

16Kodwa ukuphumelela kwabo kakukho ezandleni zabo, ngakho kangisondeli ezalulekweni zababi.

17“Kodwa kukangaki na isibane sababi sicinywa? Kukangaki besehlelwa ngamabhadi na, abawabelwa nguNkulunkulu ezondile?

18Kukangaki besiba njengomule emoyeni na, njengamakhoba ephetshulwa yisivunguzane?

19Kuthiwa, ‘UNkulunkulu ulomba isijeziso somuntu asibekele amadodana akhe.’ Kajezise yena umuntu ngokwakhe ukuze akwazi!

20Amehlo akhe kawakubone ukuchithwa kwakhe; kalunathe ulaka lukaSomandla.

21Ngoba uvele uzihlupha ngani ngemuli avele ezayitshiya nxa izinyanga zakhe azabelweyo seziphelile na?

22“Kambe ukhona ongafundisa uNkulunkulu ulwazi, njengoba yena esahlulela labaphezulu na?

23Umuntu uyafa ephilile kuhle, kukuhle konke ekhululekile,

24umzimba wakhe uzimukile, amathambo akhe egcwele umnkantsho.

25Omunye ufa elobuhlungu emphefumulweni wakhe, evele engakaze akholise lutho oluhle.

26Laba balaliswe ndawonye eceleni komunye othulini, izimpethu zinyakaze phezu kwabo bobabili.

27“Ngiyazi kamhlophe ukuthi licabangani, amacebo elidinga ukungilimaza ngawo.

28Lithi, ‘Ingaphi-ke manje indlu yesikhulu, amathente okwakuhlala kuwo abantu ababi?’

29Kalikaze libuze labo abahambayo na? Kalize lananzelela izinto abazilandisayo –

30ukuthi umuntu omubi uyaphepha ngosuku lokubhujiswa na, ukuthi uyakhululwa ngosuku lwesiphithiphithi?

31Kambe ngubani omtshela emakhaleni ngobubi bakhe na? Ngubani ophindiselayo ngalokho akwenzileyo na?

32Uthwalelwa engcwabeni, lilindwe ingcwaba lakhe ngemfanelo.

33Inhlabathi esigodini leso imnandi kuye; bonke abantu bayamlandela, banengi kakhulu njalo abahamba kuqala kulaye.

34“Pho-ke lingangiduduza njani likhuluma umoya onje? Akusalanga lutho elilutshoyo ngaphandle kwenkohliso.”